طبعا كلنا تابعنا اليومين اللي فاتوا الإنفجار الذي إندلع جراء سيارة مفخخة بجوار كنيسة القديسين في المنتزه. هذه الحادثة أحزنتني كثيرا و أعلم تماما أنها أحزنت الملايين من الشعب المصري و ربما الملايين من أنحاء العالم. ولكن أشد ما أحزنني حماقات و ترهات صدرت من بعض المسلمين المصريين. بعضهم قال : أحسن يستاهلوا. و بعضهم قال: فليرحم الله من مات. و بعضهم قال: فلتحيا الوحدة الوطنية. و بعضهم قال يحيا الهلال مع الصليب. و البعض الآخر قال : ماينفعش نرفع الهلال مع الصليب و ان دا يبقى اعتراف رسمي مننا بأنه تم صلب المسيح و قتله. و منهم من قال: لا يجب أن نرفع علامة الكفر هذه.
ولا يسعني إلا أن أقول لكل من لم يشاطر النصارى أحزانهم و لكل من فرح في أقباط مصر : سحقا لكم جميعا. فكل من لم يتأثر بهذه الواقعه لا أستطيع أن أصفه إلا بمراء و منافق كبير. فما تعلمته منذ الصغر ان ديننا – دين الإسلام – هو دين السماحة و العفو. وأذكر أن رسول الله قد أوصى المسلمين على أقباط مصر و قد قال الرسول عليه أفضل صلوات الله و سلامه في الحديث الشريف :”إذا فُتِحَتْ مصرُ فاستوصُوا بالقِبْطِ خيرا فإنَّ لهم ذِمَّةً ورحما ” طبعا هيطلع واحد و يعمل لي فيها أبو العريف و يقولك ما هو كلمة قبطي بتعود على المصريين جميعا بغض النظر عن دينهم … هرجع أقوله يعني هو لما سيدنا محمد قال الحديث عايز تقنعني ان كان في مسلم واحد في مصر ؟ طبعا لأ.أنا أشجع جدا الوحدة الوطنية و مش شايف فيها شيء انه يتم رفع الهلال مع الصليب كرمز للوحدة الوطنية و متنسوش ان دايما في اوقات الحروب و في المظاهرات كان القسيس بيمشي و في إيده الشيخ و كان الصليب مرفوع و الهلال مرفوع. و اللي ش عاجبه رمز الهلال مع الصليب ماشي يا سيدي بلاش تحط صليب . بس تعاطف مع الناس على الأقل لأنهم أخواتك و بيشاركوك نفس الوطن.
كلمة أخيرة:
جميل إنك تحب دينك و تخاف عليه بس متنساش ان الكل في النهاية مصري … الوطن شيء بيجمعنا كلنا … الوطن شيء مشترك …و صدقوني مفيش حاجة إسمها وطن من غير وحدة و الشعب اللي مفيهوش وحده عمر ما بيبقى ليه وطن و ابسط مثال عندكوا فلسطين.فلسطين تايهة مابين فتح و حماس و إسرائيل قاعدة تتفرج عليهم و تضحك من كل قلبها. و أنا مش عايز أشوف تعصب من أي جانب في مصر … مصر طول عمرها بلد الأمن و الأمان مهما يطول الزمان و إن شكيت في يوم روح إسأل الهرم و أبو الهول و هما يقولولك هما قاعدين من إمتى في حضن مصر الدافي. و في النهاية أقدر اقول الدين لله و الوطن للجميع و يحيا الهلال مع الصليب.
النهاردة عايز أكلمكم عن قرصنة السوفت وير. تفتكر هل قرصنة السوفت وير شيء حلال؟ هل ترى أنه عمل أخلاقي؟ هل أنت شايف إن دا شيء صح و المفروض نقرصن السوفت وير و نستخدم السوفت وير اللي تم كسر شفرته؟
أحب أبتدي الموضوع بفتوى شرعية مش ليا طبعا لأ دي للشيخ مفتي الممكلة العربية السعودية و أحب أتقل لكم النص بدون تحريف أو تعديل و هو كالتالي:
أجابت اللجنة الدائمة للإفتاء برئاسة الشيخ عبد العزيز بن باز مفتي المملكة العربية السعودية ورئيس هيئة كبار العلماء: بأنه لا يجوز نسخ البرامج التي يمنع أصحابها نسخها إلا بإذنهم لقوله صلى الله عليه وسلم : ” المسلمون على شروطهم ” ولقوله صلى الله عليه وسلم : ” لا يحلّ مال امرئ مسلم إلا بطيبة من نفسه ” وقوله صلى الله عليه وسلم : ” من سبق إلى مباح فهو أحقّ به ” ، سواء كان صاحب هذه البرامج مسلما أو كافرا غير حربي لأنّ حقّ الكافر غير الحربيّ محترم كحقّ المسلم . والله أعلم . فتاوى اللجنة رقم 18453
الفتوى واضحة جدا و مش محتاجة تفسير … إللي ضايقني فعلا إن في الكلية و انا في سنة تانية دار حوار كبير بيننا و بين بعض في الكلية … هل قرصنة السوفت وير دا شيء سليم؟
كان في واحد صاحبنا بدون ذكر أسماء سأل شيخ من نوعية الشيخ كفتة و أفتى له بأن سرقة السوفت وير مش حرام. واخدين بالكم من كلمة سرقة دي؟ و يقولك قال إيه مش حرام … يا حلاوة!
و أحب أذكر هنا حديث لسيدنا محمد عندما سرقت إمرأة مخزومية فقال محمد صلى الله عليه و سلم: يا أيها الناس ، إنما ضل من كان قبلكم ، أنهم كانوا إذا سرق الشريف تركوه ، وإذا سرق الضعيف فيهم أقاموا عليه الحد ، وايم الله ، لو أن فاطمة بنت محمد سرقت لقطع محمد يدها.
و هنا نرى أنه قد ذكر السرقة و لم يحدد نوعها فكل أنواع السرقة هنا سيان و تتساوى كل أفعال السرقة هنا. و صراحة لا أدري من أين أتى جهابذة آخر الزمان هؤلاء بفتوى أن قرصنة السوفت وير -التي هي نوع من أنواع السرقة – حلال طالما أن صانع السوفت وير ليس بمسلم.
في رأيي المتواضع أرى أن في الفتوى المغلوطة -التي تحل سرقة سوفت وير الشخص الغير مسلم- يشوبها الكثير من العنصرية التي لا يتسم بها ديننا فعلى العكس تماما نرى ان ديننا هو دين السماحة. يعني هو أنا مش فاهم يعني قرصنة السوفت وير اللي عامله المسلم حرام و قرصنة السوفت وير اللي عامله الغير مسلم حلال؟ طب بالله عليكم دا منطق إيه دا؟ ثم المفروض إننا نكون بمثابة رسل نرسي مكارم الأخلاق بين الشعوب حتى يتشبهوا بنا و يتبعونا مش ننشر مجرد أفكار هابطة و عبيطة عشان في الآخر نوصل لهم فكرة إننا مجرد راكبي جمال في هذا العالم ليس إلا. المشكلة حاليا إننا أي حاجة نعملها بقينا محتاجين فتوى من شيوخ عشان نعرف إيه الصح و الغلط. نفسي أعرف ليه الناس الوقت ما بيفكروش .يطبقوا الحديث المشهور :استفت قلبك ولو أفتاك الناس.
ثم أنا عايز أعرف حاجة يعني هو الغير مسلم اللي عمل السوفت وير دا مش من حقه أنه يبدع و يبتكر و يتاجر بأفكاره و سوفت ويره وسلاطاته بابا غنوجه؟هل الغير مسلم دا ما تعبش؟ ثم دا أخلاقيا عيب أوي لما نتجادل و نستعبط عشان نحلل حاجة باين جدا إنها حرام و هرجع أقولكم إنه معروف جدا إن في آخر الزمان كتير من الناس يسمون الأشياء بغير أسمائها.
خلاصة القول:
أنا مقتنع تماما بحرمانية قرنصة السوفت وير و قرصنة أي شيء. و أنا مش مع فكرة أبدا إننا نستحل شيء خاص بشخص غير مسلم حتى لو كان يهودي. ولازم دايما نفتكر إننا لازم نكون أسوة حسنة . عسى أن يهدي الله بنا غير مسلمين. و لا بد أن نتذكر أننا جميعا رسل سلام و ذوي رسالة و أنا على قناعة أن السطو على أشياء و أفكار الآخرين هو نوع من الإرهاب الذي هو دخيل على أمتنا.ثم بدل ما نقوم بالتفكير و التصنيع و الإبتكار نقوم نسرق؟ أكيد دا مينفعش و ميرضيش ربنا. فلا يستوي عند الله من هو يعمل و يجتهد و يأخذ بالأسباب و الذي يجلس و يتفرج و يسرق عمل الآخرين. و في الختام سلام.
مساء الفل عليكم.. مساء الفل عالناس الكويسة و صباح الخير على الناس المهيسة. أنا بكتب لكم المرة دي من القطار! و عايز أكلمكم عن موضوع هام و هو أشخاص سيئة للغاية بنعتقد للوهلة الأولى أو التانية أنهم ناس جيدة بس للأسف بيكونوا بعيدين كل البعد عن كل ما هو جيد. و دا ببساطة لأنهم أشخاص مصطنعة!
النوع الأول:
واحد مربي ذقنه و عاملي فيها الشيخ كفتة و يقعد يقول قال الله و قال الرسول وتلاقيه شخص تاني تماما لو حاولت تراقبه و تترقب أفعاله. تلاقيه يقولك غض البصر و تلاقيه يقعد يبص عالمزز و يتفحصهم بعينيه من أخمص القدمين .تلاقيه بينصحك بالصلاة و ضرورة إنك تصليها في وقتها و في نفس الوقت تلاقيه و هو برا بيته و لو أقيمت الصلاة في مسجد قريب منه تلاقيه ما يروحش المسجد.و يمكن كمان تلاقيه مربي دقنه مش عشان دا سنة -عن أفضل الخلق محمد عليه الصلاة و السلام- لأ دا يمكن هو عشان هو بخيل و جلدة و مستخسر يجيب مكنة جيليت من اللي بتتباع ب 2 جنيه عشان يحلق بيها دقنه. يمكن تلاقيه من الناس المعارضين تماما على حكاية الإختلاط و بعد ما تسيبه لوحده تلاقيه يحب ينغمس في الإختلاط أوي بس دا طبعا طالما محدش شايفه من الناس اللي هو يعرفهم و يعرفوه بشخصيته المصطنعه اللي هو مشهور بيها قدام اصدقائه و زملائه اللي أخدوا مقلب فيه. و دا نقدر نوصفه بإنه منافق كبير.
النوع الثاني:
و المعلم اللي من النوع دا اللي بياخد أمانه و مبيرجعهاش.بستلف منك فلوس و يقولك هرجعهالك في اقرب فرصة. و هو مش ناوي جواه إنه يرجع لك حاجة . كل الحكاية إن الأستاذ بيصهين لغاية ما انت تنسى. و بعد ما انت تنسى تلاقي الشخص دا ييجي و يطلب يستلف منك تاني و أنت زي العبيط تديله فلوس.أصلك نسيت إنه إستلف منك قبل كده! و الغريب ان النوع دا تلاقيه مدمن انه يستلف من الناس لأ و إيه حكاية السلف دي لا تقتصر أبدا على فلوس. و ممكن تلاقيه يكلمك يقولك إنه عايش الفلاشة بتاعتك و ياخدها يعمل بيها اللي هو عايزها و دا طبعا بحجة انه عايز ينقل مجموعة من البيانات المهمة. و تيجي تطلب منه فلاشتك يقولك أصل انا سلفتها لواحده صاحبتي عشان كانت محتاجاها و هرجعهالك في أقرب فرصة و تضيع الفلاشة و كل سنة و انت طيب بقى و ربنا يعوض عليك! ممكن في يوم تاني تلاقيه بيستلف منك الفلاشة الجديدة اللي انت لسه جايبها بدلا من القديمة اللي هو ضيعهالك و الجميل بقى إنه يرجعهالك محروقة! و يمكن تلاقي إن الشخص دا ممكن يكون قمة في البجاحة و يكون بيستلف حتى و هو معاه فلوس و دا ممكن يكون بسبب إن سيادته عايز يزود الموارد المالية اللي عنده و مش عايزها تنقص خالص. ونقدر نقول إن الشخص دا ميعرفش خاحة إسمها أمانة.
النوع الثالث:
تكون بقى خلاص إتخرجت. و يكون ليك صاحب أكبر منك بكذا سنة و يكون صاحبك دا بيشتغل في شركة كبيرة و أنت لسه أخضر ما تعرفش حاجة يا عيني و نفسك أي حد يساعدك. و لسوء حظك إنك تلجأ لشخص زي دا عشان يساعدك. و تلاقيه يقولك إبعت لي أنت بس السي في بتاعتك و ملكش دعوة و أنا هظبطك و هوديلك السيرة الذاتية و متقلقش أنت و شوية من الأفشخانات اللي بتتقال دي. لأ و شوف البجاحة يقولك أنا هساعدك بس ياريت أنت تساعد الأجيال القادمة و يقعد يقولك شوية كلام إنشاء. و تعدي الأيام و تعدي الشهور و يمكن تعدي السنين و صاحبك دا ميفتكرش أساسا إنك أديتله السيرة الذاتية بتاعتك. و دا نقدر نقول عليه نوع فريد من الهجاصين اللي ماليين البلد اليومين دول.
النوع الرابع:
و دا برضه ممكن تتعامل معاه بعد ما تتخرج من الكلية. في البداية لازم نتفق إن في قاعدة بتمشي في كل الشركات المصرية الخاصة منها و العامة و هي إن: لما الشركة تبقى محتاجة موظف في موقع معين في شركة الأول بتستفسر من موظفيها إذا كان في حد قريب أو معرفه يقدر يسد في الوظيفة الخالية. تخيل بقى سيناريو إنك بعد ما إتخرجت و مش لاقي شغل يا عيني و حالتك تصعب عالكفار و على الهندوس حتى! تخيل معايا كمان إنك و انت بتدور في الإعلانات لقيت شركة طالبة واحد عشان يشغل وظيفة انت تقدر تقوم بمتطلباتها على أكمل وجه و صادف إن ليك زميل كلية بيشغل في نفس الشركة اللي أنت قرأت إعلانها. تيجي تكلم الراجل و تحاول أنك تديله السيرة الذاتية الخاصة بيك عشان أنت واثق تماما أنه يقدر يوصلها للناس بتوع الإتش آر اللي في الشركة و في نفس الوقت تلاقيه يرد عليك بكل بجاحة أصل الشركة بتاعتنا كانت عايزة و خلاص عينت أربعه . و بسبب عدالة السماء تلاقي إنك بعد ما تتقبل في شغل في شركة تانية تلاقي نفس الشركة اللي صاحبك بيقول انهم عينوا ناس بتتصل بيك عشان تعمل معاك إنترفيو . و هنا بس تقدر تتأكد إن الشخص دا كداب كدب الإبل! بس كمان ممكن تبقى عارف إنه بيعمل كده عشان هو مش عايزك تبقى أحسن منه أو حتى زيه في المكانة و دا ملهوش غير سبب واحد هو خلل في الشخصية و دنائة متأصله في شخصه المصطنع.
خلاصة القول:
على فكرة أنا قابلت كل الأنواع اللي أتكلمت عليها دي و قلت بس أحذركم من الناس السيس دي. و للأسف أنا عارف أنكم هتقابلوا و قابلتوا ناس سيس زيهم . بس لا تنسوا أبدا أننا في الدنيا مش الجنة. و في الآخر ما تقولوش إني مانصحتكوش! يلا سلام.
ملحوظة أخيرة: إذا وجدت تشابه أو تطابق بين ما قمت بسرده و بين شخصيتك فأعلم أن المشكلة فيك و ليس في السرد!
هو أنا بحلم و و الا دا صوت الموبايل. بدأت أستعيد وعيي تدريجيا و أكتشف إن أنا نايم و إن الموبايل فعلا بيرن. إيه دا؟ أنا مش مصدق نفسي. دا بقاله شهور ما بيرنش لدرجة إني إفتكرت إنه باظ. الحمد لله الحمد لله الموبايل سليم.إيه الهبل دا؟ أنا نسيت إن الموبايل رن. رد رد يا عم خفاجة بسرعة يمكن تكون شركة.
أنا: ألو.
مجهول: السلام عليكم. حضرتك الباشمهندس محمد عاطف؟
أنا: آه أنا أنا. ومابيني و بين نفسي: إيه الصوت الملائكي دا؟ أكيد صاحبته مزة مزة.
مجهول: معاك فلانة الفلانية من شركة كذا كذاو كنت بتصل عشان عايزين نعمل معاك إنترفيو.
أنا: إمتى؟
مجهول: يناسبك يوم كذا الساعه 3؟
أنا : آه مناسب.
و هنا إنتهت المكالمة
و عدى كذا يوم. و ركبت السوبر جيت كالعادة ووصلت القاهرة أخيرا بعد يوم حار جدا. الجدير بالذكر إن في اليوم دا درجة الحرارة في القاهرة كانت 52 درجة مقلية أقصد مئوية في الظل . تخيلوا في الظل!!
حمد الله عالسلامة يا عم. معلش بقى أصلي وصلت ميدان رمسيس يا أخوانااااااا!
و إتصلت بالشركة عشان أعرف أوصل للعنوان فين بالظبط.و إذا بالمزة ترد عليا و تقولي قول للتاكسي: مدينة نصر في ظهر شركة إنبي. و طبعا ركبت تاكسي من عند عمو رمسيس عشان أنجز و أكيد الراجل لما عرف إني من المنصورة قال أضحك عليه و أغلي الأجرة بما إنه مش عارف النظام.و فعلا المعلم طلب 50 جنيه و بما إني مش عارف النظام فدفعت للأسف!
وصلت أخيرا مدينة نصر عند شركة إنبي. نزلت من التاكسي و قعدت أدور و أدور على الشركة الفلانة و أسأل الناس مفيش خد عارف يفيدني. المهم و انا بدور في الشارع لمحت في الجهة المقابلة 3 أشخاص قاعدين على رصيف عريض على كراسي بلاستيك و حاطين شمسية من بتاعت البحر على الرصيف. إيه أنتوا نسيتوا إني قلتلكوا إن درجة الحرارة 52 و الا إيه؟
سألت ال 3 أشخاص على على مكان الشركة اللي المفروض إني عندي إنترفيو فيها. فسألوني : هي الشركة دي فين؟! و طبعا إضطريت أمسك نفسي. و إفتكرت معلومة مهمة و هي إن الشركة دي موجودة في منطقة إسمها المنطقة الحرة فقلت للناس اللي كانوا قاعدين.
واحد من الناس اللي قاعدة قالي: إنت إيه اللي جابك هنا؟! طب معاك عربية؟
أنا : لأ مش معايا سبتها تحت البيت النهارده!
واحد من الناس اللي قاعده: طيب أنت تركب تاكسي و تقوله كذا كذا.
ركبت تاكسي و قلتله كذا كذا زي ما الشخص وصفلي ووصلت أخيرا المنطة الحرة في مدينة نصر . و المنطقة دي كانت بصراحة حرة و حرة أوي كمان تقدروا تقولوا إنها مكان قريب الشبه من القرية الذكية.و بسرعة دخلت عشان أدور على مبنى تيت تيت اللي في المنطقة الحرة وآخيرا وصلت للمكان و كنت قدام الأوفيس بوي الساعه 3 بالثانية.قلتله أنا عندي إنترفيو مع واحده إسمها آية حسين. قالي طيب إتفضل حضرتك في الريسيبشن لمدة دقيقتين لغاية ما هي تيجي لحضرتك. أستنى دقيقة و إتنين و تلاتة و عشرين و مفيش حد جه. و فاتت نصف ساعة و بعدها و انا في الريسيبشن ألاقي صاروخ أرض جو ماشي يا جدعان في الريسيبشن بالميكرو جيب و الكعب العالي. و انا بقى في سري قاعد أقول يا أرض إنهدي ما عليكي قدي. البنت كانت موز موز موز على رأي عمرو أديب و كنت بتمنى في سري إنها تكون آية حسين اللي هتعمل معايا الإنترفيو بس للأسف مطلعتش هي! و فضلت أستنى و أستنى لغاية ما عدى ساعة إلا ربع بالتمام و الكمال. و فجأة ألاقي مزة زي القمر محجبة تقرب مني بتهادي و إيقاع منتظم و تقولي : إنت محمد عاطف؟
أنا : آه أنا محمد عاطف.
آية: هو أنت جبت السيرة الذاتية بتاعتك معاك؟
أنا مع إرتسام ملامح الأسى و الحزن: ما أنا بعتتها لكم قبل كده.
آية: أصل أنا مش لاقياها.
أنا في سري: في داهية السي في . تحبي أكتبلك السي في بتاعتي كلها الوقت يا قمر؟ و بعد لحظة من السرحان: هي معايا عالإيميل.
آيه: طب تعالا ورايا!
و روحنا مكتب البنوتة بتاعت الإتش آر اللي هي آية. و قعدت على جهاز و نزلت السي في و إديتهالها عشان تطبعها.
و بعد ما طبعت السي في سألتني سؤال ذكي: هو إنت عملت إيه من أول ما أتخرجت؟
مممممممم و قلت نفسي في عقل بالي : من الواضح إن القطة مقرتش السي في و شكلي كده هبتدي أزعل منها. و بعد برهة من الدهشة حكيتلها قصة حياتي من أول ما أتخرجت.
و بعد ما أتكلمنا خمس دقائق قالت لي : دقيقة واحدة هشوف حد يعمل معاك تكنكال إنترفيو. و غابت القطة دقيقتين و رجعت تقولي : إحنا آسفين بس مفيش حد هيقدر يعمل لك إنترفيو النهارده ! طبعا أنا إتصدمت و إتصعقت و بلمت و زعلت و أصابني مجموعة من الأحاسيس السيئة. و بعد برهة من الزمن إستجمعت قوايا و قلتلها ألف شكر. وأنا ماشي سألتي سؤال زعلني أكتر: هو أنت تحب تشتغل إيه أكتر: داتابيز إدمنستريتور و الا نتورك أدمنستريتور؟
طبعا بعد ما سمعت السؤال أنا أتنرفزت و قلتلها : بس أنا مقدم على وظيفة مبرمج جافا إيه علاقة اللي أنا مقدم ليه باللي إنتي بتقوليه؟
فقالت لي :أصل الوظيفة اللي إنت مقدم عليها مش موجودة حاليا!
طبعا أنا قلت في عقل بالي: أمال بعتتوا لي ليه يا ولاد التيــــــــــــــــت؟ دا النهارده درجة الحرارة 52 في الظل يا ظلمة. و بعد برهة قلتلها: داتا بيز أدمنستريتور. و مشيت و أنا كاظم كمية غضب ما بينفعش إنهم يتجمعوا في يوم واحد. و طلعت من المنطقة الحرة و قعدت ادور على اي تاكسي يوديني عل ميدان رمسيس و كان كل تفكيري في ماتش الأهلي لأن فريقي المفضل كان هيلعب يومها و كان خسران في ماتش الذهاب 2-0 بس الحمد لله كسب 3-0 في ماتش العودة و أتأهل لدور التمانية في بطولة أفريقيا و إنتهى يومي بفرح جميل بعد ما كان إبتدى بكآبة منقطعة النظير!
خلاصة القول:
والله يا أخواننا مش عارف أقولكوا إيه! بس تعرفوا في حياتنا كتير مواقف بتعدي علينا و بتبقى قمة في البواخة بس برضه لازم نتعايش و نتكيف مع الحياة لإننا في الدنيا مش في الجنة. بس اللي لاحظته من الإنترفيوهات الكتيرة اللي أنا عملتها إن كتير جدا من متخصصي الإتش آر ملهومش فيها و ميعرفوش حاجة عن العلم الراقي إللي إسمه موارد بشرية. و أنا أقدر أقولكم إن الإتش آر في الأول و في الآخر ما هو إلا فن إنساني من الممكن أن يتقنه بني آدم عنده شوية من الأحمر. يلا بقى كفاية كده عشان أكيد وجعتلكوا دماغكوا. سلام!
أنا إتخرجت في شهر 7 لسنة 2009 من كلية الحاسبات و المعلومات جامعة المنصورة وبعدها إبتديت أدور على شغل زي أي خريج أجتهد و تعب و عايز يكلل مجهود تعب أستمر لمدة 17 عام دراسي! و أبتديت الرحلة الطويلة اللي كنت فاكرها هتبقى سهلة بحكم إني كنت بجتهد و بتعلم و بطور نفسي-على غير عادة الكثير من أقراني- عشان أقدر ألاقي شغل.
بس طبعا الواقع بيبقى مختلف تماما عن الخيال . و دا طبعا بسبب كوني متفائل ساعتها و الظاهر والله أعلم إني ساعتها كنت متفائل زيادة عن اللزوم.
هو طبعا من حسن حظي إني أول ما أتخرجت لقيت شركة عايزة إنستركتور جافا في المنصورة و إبتديت أدي كورسات جافا في شركة في المنصورة بدون ذكر أسماء و كنت مبسوط أكيد إني بعلم ناس تكنولوجيا محببة لقلبي اللي هي الجافا بس طبعا روحي كانت متعلقة بالديفلوبمنت أكتر من صغري.
وبعد ماخلصت كورس من الكورسات قررت إني أحقق حلمي بإني أشتغل كديفيلوبر لأني كنت دايما مقتنع إن مجال الديفيلوبمنت هو المجال اللي هقدر أطلع فيه إبداعي.و أبتديت أبعت السيرة الذاتية الخاصة بيا لشركات كتير و أنتظرت أكتر.
وفي يوم خير اللهم أجعله خير موبايلي رن آخيرا بعد ما زهق من كتر الإنتظار.
أنا: ألو . السلام عليكم!
مجهول: وعليكم السلام و رحمة الله و بركاته. حضرتك الباشمهندس محمد عاطف؟
أنا: أيوه أنا!
مجهول: معاك فلانة بنت علانة من الشركة الترتانة و كنت عايزة أعرف إذا كنت فاضي يوم كذا عشان نعمل معاك إنترفيو.
أنا: اه فاضي . طب العنوان؟
مجهول: الجيزة – المهندسين – شارع تيت تيت تربتا تيت!
و أنتهت المكالمة!
وطبعا كان ليا صديق كان بيشتغل في الشركة دي أول حرف من إسمه عمرو صلاح. إتصلت بالراجل و أستأذنت أبات عنده عشان أنا عرفت من الشركة انهم هيعملولي 7 إمتحانات تكنيكال و ذكاء و إنجليزي و بعدها بيومين هيعملوا معايا إنترفيو إتش آر! طبعا الراجل رحب بشدة و إستقبلني أحسن إستقبال.
نيجي بقى ليوم الإمتحانات:
صحيت بدري و روحت مع صديقي للشركة الترتانة عشان أمتحن كذا إمتحان.و تك تك حليت الإمتحانات. نيجي بقى لإمتحان الآي كيو اللي هو الذكاء و بصراحة زعلت أوي لما شوفت الإمتحان مش عشان أنا مش عارف أحله لا سمح الله لكن بسبب أني لقيت الإمتحان فيه أربع أسئلة غلط .و دا زعلني أوي من الشركة دي أصلي كنت فاكرها نينجا طلعت ترتر! سلمت الإمتحانات و قمت مروح عشان أستنى لليوم الموعود عشان مقابلة الأتش آر المنتظرة و قعدت بقى أدور على الفيس بوك و لقيت أكونت للشركة على الفيس بوك فيه مواضيع بتتكلم عن إزاي الواحد يقدر يؤدي بسلاسة و نجاح في المقابلات اللي من النوع دا. و ذاكرت الأسئلة أوي و بصراحة الأسئلة كانت عبيطة و الأجوبة كانت أعبط منها!
و ذهبت لمقابلة الإتش آر وأدائي فيها كان زي الفل و إجتزتها بنجاح و في نهاية المقابلة متخصصة الإتش آر قالت لي إنت كده نجحت تقريبا . بس ناقص لك إنك تقابل التكنكال ماندجر عشان يقولك هتشتغل إزاي و كده. و قالت لي كمان إنتظر مننا مكالمة ماكسيمم يوم الخميس من نفس الإسبوع عشان نحدد لك هتقابل المدير إمتى. و يفوت الإتنين و الثلاثاء و الأربعاء و الخميس و محدش يرن حتى عليا!
و خلص الإسبوع و محدش إتصل. و تعدى الأيام لحد ما نوصل ليوم الإثنين من الإسبوع اللي بعده و أصحى و أفتح إيميلي زي بقية البشر على وجه الأرض و ألاقي رسالة نصها بيقول : إحنا آسفين بس الوظائف الحالية الموجودة لا تتناسب مع إمكانياتك.
إتضايقت بصراحة و قلت أتصل بيهم أستفسر إيه السبب.
ترررررررررررن
مجهول: ألو
أنا: ألو لو سمحت أنا كنت عملت إنترفيو و إسمي كذا و إنتوا بعتتوا لي إيميل بيقول كذا كذا و متخصصة الإتش آر كانت قالت لي كذا فأنا مش فاهم في إيه بالظبط؟
مجهول: أصل حاليا مفيش وظائف خالية.
أنا : طب إزاي مفيش وظائف و إنتوا بعتتوا لواحد إسمه كذا وواحد إسمه كذا.
مجهول:هو في وظائف بس مفيش ليك أنت!
أنا: طب ليه؟ هل دا ليه علاقة بأني فلسطيني؟
.مجهول : لأ
أنا: طب ممكن أكلم أي حد يفهمني إيه السبب؟
مجهول : لو كلمت أي حد هيقولك نفس الكلام!
و هنا إنتهت المكالمة.
أصل خلاص فهمت أن أنا بكلم واحدة حافظة و مش فاهمة.هو صحيح فضلت متضايق شوية بس عادي أهي تجربة و عدت. المشكلة بقى فعلا كمية الإمتحانات اللي إمتحنتها . حسسوني إني هروح أشتغل في جوجل رغم إنها شركة عادية و يمكن أقل من العادية و كان عدد مبرمجي الجافا فيها تقريبا 3 أشخاص.
و بعد أول كذا إسبوع من الرحلة إقتنعت إنها مش هتبقى سهلة و مفروشة بالورود زي ما انا كنت فاكر.
نصيحة: لا تفرط في التفاؤل حتى لا يصيبك الإحباط عندما لا تجد ما تبحث عنه و لا تفرط في التشاؤم حتى لا تبخس الفرحة حقها عندما تنال ما تتمنى.
يا ترى إيه هو معنى الإنتماء؟ ممكن تقولوا إن الإنتماء هو إنحياز فرد لجماعة ما لأسباب ربما تكون دينية أو سياسية أو ثقافية أو رياضية أو حتى أي أسباب ملهاش علاقة بأرض الواقع. يعني ممكن نستنتج إن الإنتماء دا بيبقى ناتج عن إعتقاد شخصي أو ربما إيمان داخلي .
بعيدا عن الكلام المجعلص أوي دا .و بعيدا عن التعريف. أنا عايز أتكلم عن الإنتماء لبلد ما !
كتير أوي من أصحابي دا إذا مكانش كلهم يحاولوا يقنعوني منذ بدء الخليقة أن الإنسان لازم يكون إنتمائه للبلد اللي هو مولود فيها. بس مين قال إن كلامهم دا صح؟. مين قال انه لازم وواجب على الفرد إنه ينتمي للمكان اللي هو أتولد فيه؟ مش جايز يكون إتولد في المكان الغلط؟
الغريب أوي أن أصدقائي و المجتمع اللي حواليا قصروا الإنتماء على مجرد الإنتماء لبلد و نسوا أنواع الإنتماء التانية . و كنت أحس أنهم محروقين أوي لما أقولهم أني مش حاسس اني بنتمي للبلد اللي مولود فيها. مش فاهم أنا إيه اللي مزعلهم في الموضوع؟
نرجع تاني لموضوع الإنتماء. ما عندك ناس كتير أوي على مدار التاريخ إتولدوا في بلد ما و عاشوا سنين عديدة في البلد اللي أتولدوا فيه بس كان إنتمائهم لبلد آخر زي مثلا حبيب قلبي أدولف هتلر. الراجل دا كان واحد من أعظم الأمثلة للإنتماء لألمانيا رغم إنه أتولد في النمسا و عاش فيها قدر من الزمن.
عندكم مثال تاني للإنتماء لبلد لشخص ما أتولدش فيها السلطان سيف الدين قطز. مش فاكر أتولد فين بصراحة. و بعد كده بقى عبد و عاش في سوريا فترة من الزمن و بعدين في آخر المطاف أستقر في مصر و أنتمى ليها و بقى القائد الأعظم في جيشها و بقى سلطان فيها و حارب المغول و هو على قمة جيش .مصر. أكيد الراجل دا كان بينتمي بطريقة أو بأخرى لمصر مع العلم إنه ما أتولدش فيها و كمان مش هيا وطنه الأم.
من المثالين اللي فاتوا ومن أمثلة كتير موجودة داخل أروقة التاريخ نقدر نقول أن الإنسان مش لازم يكون إنتمائه للبلد اللي هو مولود فيها و ممكن يكون منتمي لمكان آخر.
لما كنت أجي أقول قدام أصدقائي إن أنا فلسطيني بحكم إني حامل للجنسية الفلسطينية . كانوا يقولولي منين ياخويا؟ أنت عمرك رحت فلسطين دي يابني؟ أقولهم لأ بس برضه فلسطيني. يقولولي لازم يكون الواحد إنتمائه للمكان اللي عايش فيه و خيره عليه ووو. بس هما نسوا ان المكان ملهوش علاقة أوي بحكاية الإنتماء. و واحد صاحبي تاني يقولي إيه يا عم. أنت ما شربتش من نيلها و الا إيه؟ و كل واحد فيهم بطريقة غير مباشرة حاول يفرض عليا إنتمائه الخاص من غير ما ياخد باله . و كأن البلد اللي هما بينتموا ليها هي بلد الله المختار و المحببه إلى الله و نسوا إن الأرض كلها ملك لربنا و نسوا إن أنا ليا حرية إختيار المكان اللي أنتمي إليه زي ما هما إختاروا.أنا لا أستطيع أن أنكر أبدا أن في أماكن محببه إلى الله. بس دا لا يعني بالضرورة إني أكون منتمي بشدة لهذه البلاد. بس دا لا يمنع إني أيضا بحب الأماكن دي. بس أعذروني بقى القلب و ما يهوى.
خلاصة القول:
كل واحد فينا ليه إنتمائه النابع من قناعاته الشخصية أو إيمانه بفكرة ما أو إيمانه بقضية ما و أنا مؤمن بقضية فلسطين و بالشعب اللي كل يوم بيعاني دا و مازال موجود على وجه الأرض زي ما كان هتلر مؤمن بأمته الألمانية اللي حاول أنه يجعلها أعظم أمه على وجه الكوكب بعد سنين عديدة من ذل الألمان على يد الفرنسيين.
كانت فتاة كالحلم حلم وردي اللون في ليلة قمراء.كنت أهيم بها عشقا و لكني قد إخترت وقتا غير مناسب لأخبرها فيه عن حبي وولهي.كانت الحماسة تملأني و رحت أعد الأحلام واحدا تلو الآخر و لكن لم يدر بخلدي يوما ما سيكون و لم يجر ببالي أبدا ما خبأته لي الأقدار.أحببتها و بعنف و تركتها بذات العنف.ومضى الوقت سريعا و إذا بعام قد مر.مضى عام منذ آخر مرة رأيتها منذ آخر بسمة أرتسمت على شفتيها.وإذا بي ذات ليلة قمراء كليال محبوبتي أبعث إليها برسالة أسائلها عن حالها و ما قد حل بها.وأنا الآن منتظر.ترى هل ستذكرني؟ترى هل سأكون ببالها كما هي ببالي لم تبرح مكانها؟أشك بهذا فقد كنت قاسيا آخر مرة تجاذبنا فيها أطراف الحديث.والآن لا يسعني إلا الإنتظار و أرى إن كانت ستذكرني أم أنني قد أضحيت ماضيا منسيا!
